Ymgynghoriad cyhoeddus 10 wythnos CNC ar Barc Cenedlaethol newydd

Mae Cyfoeth Naturiol Cymru (CNC) yn gwahodd pobl i rannu eu barn ar y drafft o’r map ffiniau (y cyfeirir ato fel Map yr Ardal Ymgeisiol) ar gyfer Parc Cenedlaethol newydd arfaethedig yng Nghymru.

Bydd y cyfnod ymgynghori cyhoeddus, sy’n cynnwys cyfres o ddigwyddiadau galw heibio i’r cyhoedd, digwyddiadau ar-lein a digwyddiadau penodol i randdeiliaid, yn rhedeg o ddydd Llun 7 Hydref tan 23:59 ddydd Llun 16 Rhagfyr 2024.

Mae Llywodraeth Cymru wedi comisiynu CNC i asesu’r dystiolaeth a’r achos dros gael Parc Cenedlaethol newydd ac i wneud argymhelliad. Cafodd ardal astudiaeth (y cyfeirir ati fel yr Ardal Chwilio), sy’n seiliedig ar ‘Dirwedd Genedlaethol’ Bryniau Clwyd a Dyffryn Dyfrdwy, ei nodi a’i rhannu yn ystod cyfnod ymgysylltu â’r cyhoedd ar ddiwedd 2023. Yn dilyn hyn a chyfnod o hel tystiolaeth, drwy gydol misoedd yr hydref a’r gaeaf bydd CNC yn ymgynghori â’r cyhoedd ar y cynnig sy’n dod i’r amlwg.

Mae holiadur i gasglu adborth bellach yn fyw ar wefan y prosiect.

Neu gallwch lenwi copi papur o’r holiadur (gallwch ei godi mewn digwyddiad galw heibio) a’i anfon yn ôl atom drwy’r Rhadbost.

Meddai Ash Pearce, Rheolwr Rhaglen yn nhîm Rhaglen Tirweddau Dynodedig CNC:

“Er mwyn sefydlu Parc Cenedlaethol newydd mae’n rhaid i CNC fod yn hyderus y bydd yn rheoli risgiau a manteisio ar y cyfleoedd sydd ar gael, er mwyn gwella byd natur, pobl a chymunedau.

"Rydyn ni wedi casglu rhagor o dystiolaeth yn 2024 ac mae’r map rydyn ni’n ei rannu nawr wedi newid i adlewyrchu hyn. Bellach mae gennym ddarlun llawer cliriach o’r risgiau a’r cyfleoedd sy’n gysylltiedig â chreu Parc Cenedlaethol newydd, ond hefyd y risgiau sy’n gysylltiedig â pheidio â mynd i’r afael â’r ffactorau sydd eisoes ar waith, er enghraifft pwysau gan ymwelwyr, tai, dirywiad byd natur a newid hinsawdd.

"Mae gennym ddiddordeb mewn clywed gan unrhyw un sydd wedi’i effeithio neu sydd â diddordeb, rydym am wrando ar yr amrywiaeth o safbwyntiau, ac yn arbennig o awyddus i dderbyn unrhyw wybodaeth neu dystiolaeth newydd sy’n ymwneud â’r cynnig cyn i CNC ddod i’w gasgliad. Rydym yn annog pawb i lenwi ein holiadur ar ôl gweld crynodeb o’r dystiolaeth.”

Bydd y digwyddiadau ymgynghori cyhoeddus yn gyfle i ddysgu mwy am y prosiect a’r dystiolaeth a gasglwyd hyd yma, i ofyn cwestiynau i’r tîm a rhannu adborth ar y drafft o’r map ffiniau y cyfeirir ato fel Map yr Ardal Ymgeisiol.

Anogir pobl naill ai i alw heibio mewn digwyddiad wyneb-yn-wyneb neu anfon e-bost at dîm y prosiect yn rhaglen.tirweddau.dynodedig@cyfoethnaturiol.cymru i gofrestru ar gyfer digwyddiad ar-lein. Dim ond un digwyddiad fydd angen i bobl fynd iddo gan y bydd yr wybodaeth a rennir yr un fath ar gyfer pob digwyddiad.

Digwyddiadau galw heibio i’r cyhoedd

Digwyddiadau cyhoeddus ar-lein

Digwyddiadau grŵp wedi’u targedu

I gael gwybod mwy ewch i wefan ein prosiect. Bydd yr holl adnoddau ymgynghori ar gael ar wefan y prosiect o 7 Hydref 2024 ymlaen.