Cynghorydd Cynllunio Arbenigol ar gyfer Seilwaith

Tîm / Cyfarwyddiaeth: Cynllunio, Tirwedd ac Ynni / Tystiolaeth Polisi a Thrwyddedu

Cyflog cychwynnol: £41,132 yn codi i £44,988 fesul cam bob blwyddyn. (Pro rata ar gyfer ymgeiswyr rhan-amser). 

Math o gytundeb: Parhaol

Patrwm gwaith: Llawn amser, 37 awr yr wythnos (Rhoddir ystyriaeth i weithio’n rhan amser, oriau blynyddol, oriau cywasgedig neu weithio yn ystod amser tymor – croesewir trafodaethau yn ystod y cyfweliad) 

Dyddiad cyfweld: Wythnos yn dechrau 15 Medi 2025

Rhif swydd: 203920

Y rôl

A ydych chi'n angerddol am yr amgylchedd ac yn barod i ddylanwadu ar sut mae prosiectau ynni a seilwaith mawr yn cael eu datblygu yng Nghymru? Ymunwch â'n Tîm Cynllunio, Tirwedd ac Ynni yn Cyfoeth Naturiol Cymru (CNC) a helpu i lunio dyfodol mwy cynaliadwy.

Yn y rôl hon, byddwch yn arwain rhaglen waith sy'n cefnogi rôl gynghori hanfodol CNC mewn perthynas â defnyddio ynni adnewyddadwy a seilwaith arall. Byddwch yn gyfrifol am greu canllawiau a chyngor newydd i ddylanwadu ar benderfyniadau a wneir gan ddatblygwyr, cynllunwyr ac awdurdodau cynllunio – gan sicrhau bod blaenoriaethau amgylcheddol yn cael eu hystyried wrth leoli, gosod a dylunio prosiectau.

Byddwch hefyd yn cefnogi cydweithwyr yn CNC drwy baratoi cyngor clir ac ymarferol i'w helpu i ymateb yn effeithiol i ymgynghoriadau ar gynlluniau datblygu a cheisiadau cynllunio.

Mae hon yn rôl gydweithredol iawn. Byddwch chi'n gweithio ochr yn ochr â chydweithwyr arbenigol ar draws timau amgylcheddol, rheoleiddiol a gweithredol. Byddwch hefyd yn ymgysylltu â rhanddeiliaid allweddol yn y sectorau cynllunio ac ynni, gan feithrin perthnasoedd proffesiynol cryf a fydd yn helpu i gael effaith yn y byd go iawn.

Os ydych chi'n chwilio am rôl lle gall eich arbenigedd lunio dyfodol amgylchedd, ynni a chymunedau Cymru, dyma'ch cyfle.

Fel sefydliad, rydym yn cefnogi gweithio hyblyg.  Byddwch yn cael eich contractio i swyddfa CNC o fewn y lle, a bydd gofyn i chi fynd yno ar gyfer cyfarfodydd rheolaidd, hyfforddiant ac ar gyfer cyfarfodydd un i un gyda'ch rheolwr. Bydd y rhain yn cael eu cynllunio ymlaen llaw.

I wneud ymholiad anffurfiol am y rôl hon, cysylltwch â Adrian James

 adrian.james@cyfoethnaturiolcymru.gov.uk

Bydd cyfweliadau’n cael eu cynnal ar Microsoft Teams

Bydd ymgeiswyr llwyddiannus yn destun gwiriad boddhaol gan y Gwasanaeth Datgelu a Gwahardd. Fel arfer, gwneir apwyntiadau o fewn 4–8 wythnos i'r dyddiad cau

Amdanom ni

Mae ein Tîm Cynllunio, Tirwedd ac Ynni yn rhan o Gyfarwyddiaeth Tystiolaeth, Polisi a Thrwyddedu CNC. Rydym yn gyfrifol am ddarparu cyfeiriad strategol ar gyfer meysydd cynllunio datblygu, tirwedd ac ynni i'r sefydliad ehangach. Mae ein gwaith yn gwneud cyfraniad gwerthfawr at genhadaeth CNC i gefnogi adferiad natur, gwydnwch Cymru i newid hinsawdd ac ymdrechion i leihau llygredd.

Yr hyn y byddwch chi’n ei wneud

• Paratoi asesiadau technegol, gan ddefnyddio ystod o wybodaeth a data cymhleth.
• Rheoli'r gwaith o baratoi deunydd i lywio datblygiad dogfennau polisi, cyngor a chanllawiau CNC, Llywodraeth Cymru a phartneriaid eraill; rheoli datblygiad gweithdrefnau, offer a chanllawiau; ac arwain y gwaith o gyflwyno ffyrdd newydd o weithio.
• Cysylltu â rhanddeiliaid allanol fel Llywodraeth Cymru, cynrychiolwyr y sector a phartneriaid er mwyn sicrhau bod rhwymedigaethau prosiectau, polisïau neu strategaethau yn cael eu cyflawni’n amserol ac yn effeithiol.
• Cynghori ar anghenion tystiolaeth a chyfleoedd, a rheoli prosiectau tystiolaeth y cytunwyd arnynt, yn unol â’r rhaglen dystiolaeth y cytunwyd arni.
• Cefnogi ymgysylltu â sectorau, partneriaid, Llywodraeth Cymru, Cymdeithas Swyddogion Cynllunio Cymru, Penderfyniadau Cynllunio ac Amgylchedd Cymru, arweinwyr sector a busnes, cyrff amgylcheddol, a chyrff proffesiynol a statudol eraill yn y DU, a bod yn brif bwynt cyswllt ar gyfer ymholiadau cwsmeriaid.
• Cynnal gwybodaeth ymarferol fanwl am y sector(au) neilltuedig, gan nodi goblygiadau newidiadau mewn deddfwriaeth, technoleg a’r farchnad ar gyfer Cyfoeth Naturiol Cymru a’r sector(au).
• Cyfrannu at grwpiau gorchwyl a gorffen, a gomisiynir drwy’r byrddau busnes, er mwyn paratoi cynhyrchion pendant yn ôl y gofyn.
• Cydweithio ag arweinydd y tîm i ddatblygu a chyflenwi cynllun datblygu personol y cytunir arno. 
• Ymgymryd â dyletswyddau a chyfrifoldebau iechyd a diogelwch sy'n briodol i'r swydd.
• Ymrwymiad i Bolisi Cyfle Cyfartal ac Amrywiaeth Cyfoeth Naturiol Cymru, ynghyd â dealltwriaeth o sut mae’n gweithredu o fewn cyfrifoldebau’r swydd.
• Bod yn ymrwymedig i'ch datblygiad eich hun trwy ddefnydd effeithiol o Sgwrs.
• Unrhyw ddyletswyddau rhesymol eraill y gofynnir amdanynt sy'n gymesur â gradd y rôl hon.

Eich cymwysterau, profiad, gwybodaeth a sgiliau 

Yn eich cais a’ch cyfweliad, gofynnir i chi ddangos y sgiliau a’r profiad canlynol gan ddefnyddio dull STAR.

1. Gwybodaeth am y canlynol: deddfwriaeth Cymru, y DU a'r UE sy'n ymwneud â chynllunio defnydd tir ac ynni; ysgogwyr polisi a strategaethau Llywodraeth Cymru a Llywodraeth y DU mewn cynllunio defnydd tir ac ynni; a'r materion a'r cyfleoedd yng Nghymru.
2. Profiad o ddadansoddi technegol a dehongli amrywiaeth o ffynonellau gwybodaeth a data cymhleth ym maes cynllunio defnydd tir ac ym meysydd amgylcheddol, cymdeithasol, economaidd, diwylliannol a gofodol, gan gynnwys paratoi cynlluniau datblygu a phrosesau cynllunio datblygu ac asesu amgylcheddol (gan gynnwys Asesiadau Amgylcheddol Strategol, Asesiadau Rheoliadau Cynefinoedd ac Asesiadau o’r Effaith Amgylcheddol).
3. Gweithio gyda Llywodraeth Cymru, yr Arolygiaeth Gynllunio, awdurdodau lleol, tirweddau dynodedig, cyrff proffesiynol, busnesau a sectorau.
4. Profiad o weithio mewn amgylchedd rheoli rhaglenni a phrosiectau, a rheoli prosiectau a/neu gymwysterau yn y maes hwn. 
5. Byddwch yn aelod o’r Sefydliad Cynllunio Trefol Brenhinol yng Nghymru / corff proffesiynol amgylcheddol arall a/neu'n gweithio tuag at aelodaeth.
6. Rhannu eich gwybodaeth a’ch arbenigedd er mwyn helpu i ddatrys problemau, gan gynorthwyo pob pennaeth busnes yn y Gyfarwyddiaeth Tystiolaeth, Polisi a Thrwyddedu yn ôl yr angen.

Gofynion y Gymraeg

• Hanfodol: Lefel A1 - Lefel Mynediad  (y gallu i ddeall a defnyddion ymadroddion a chyfarchion syml, dim gallu i sgwrsio yn Gymraeg)

Noder: Os nad ydych yn bodloni’r gofynion A1, h.y. y gallu i ddeall brawddegau sylfaenol ac ynganu enwau Cymraeg yn gywir, mae CNC yn cynnig amrywiaeth o ddewisiadau dysgu a chymorth staff i’ch helpu i fodloni’r gofynion sylfaenol hyn yn ystod eich cyflogaeth gyda ni.

Buddion

Bydd y rôl hon yn cynnig amrywiaeth o fanteision, gan gynnwys:

• cynllun Pensiwn y Gwasanaeth Sifil sy’n cynnig cyfraniadau o 28.97% gan y cyflogwr (bydd staff mewnol llwyddiannus yn aros yn eu cynllun pensiwn presennol)
• 28 diwrnod o wyliau blynyddol, yn codi i 33 diwrnod
• absenoldebau hael ar gyfer eich holl anghenion mewn bywyd
• ymrwymiad i ddatblygiad proffesiynol
• manteision a chymorth o ran iechyd a lles
• awr les wythnosol y gallwch ddewis pryd i’w defnyddio

Gweler y manylion llawn ar gyfer yr holl fuddion y byddwch yn eu cael fel gweithiwr.

Daliwch ati i ddarllen

Rydym yn angerddol am greu gweithlu creadigol ac amrywiol ac yn annog ceisiadau gan gymunedau heb gynrychiolaeth ddigonol. Rydym yn croesawu ansawdd cyfleoedd heb ystyried oedran, anabledd, ailbennu rhyw, statws priodasol neu bartneriaeth sifil, beichiogrwydd a mamolaeth, hil, crefydd neu gred, rhyw, cyfeiriadedd rhywiol.  

Rydym wedi ymrwymo i gyfle cyfartal, ac rydym yn gwarantu cyfweliadau ar gyfer ymgeiswyr ag anableddau sy'n bodloni'r meini prawf gofynnol.

Rydym yn dymuno denu a chadw staff talentog a medrus, felly rydym yn sicrhau bod ein graddfeydd cyflog yn aros yn gystadleuol. Nodir graddfeydd cyflog ar ddisgrifiadau swydd wrth hysbysebu. Mae’r bobl a benodir yn cychwyn ar bwynt cyntaf y raddfa, gyda chynnydd gam wrth gam bob blwyddyn.

Rydym am i'n staff ddatblygu'n broffesiynol ac yn bersonol. O ddatblygu eu sgiliau arweinyddiaeth i gael mynediad i gyrsiau addysg bellach ac uwch, mae ein staff yn cael cyfleoedd i ehangu eu gwybodaeth mewn amrywiaeth o bynciau, cynnal eu gwybodaeth o’r datblygiadau diweddaraf yn eu maes a pharhau i ddysgu wrth i'w gyrfa ddatblygu.  

Rydym yn sefydliad dwyieithog sy’n cydymffurfio â Safonau’r Iaith Gymraeg ac sydd wedi ymrwymo i gyfle cyfartal.  Ystyrir sgiliau Cymraeg yn ased i’r sefydliad, ac rydym yn annog ac yn cefnogi staff i ddysgu, datblygu a defnyddio eu sgiliau Cymraeg yn y gweithle. Mae croeso i chi wneud cais am unrhyw swydd wag yn Gymraeg neu Saesneg a bydd unrhyw gais a gyflwynir yn cael ei drin yn gyfartal.

Gwnewch gais am y rôl hon

Cadwch y manylion hysbyseb yma ar gyfer cyfeirnod yn y dyfodol gan na fyddant ar gael ar-lein ar ôl y dyddiad cau.