Parc Coedwig Afan – Canolfan Ymwelwyr, ger Port Talbot
Prif fan cychwyn ar gyfer llwybrau beicio mynydd...
Coedwig Crychan - Brynffo, ger Llanymddyfri
Beth sydd yma
Mae'r holl lwybrau yma ar gau.
Efallai y byddwn yn cau'r maes parcio a chyfleusterau eraill ar fyr rybudd wrth i ni wneud gwaith adfer oherwydd difrod yn sgil stormydd diweddar. Dylech bob amser ddilyn unrhyw gyfarwyddiadau a roddir gan arwyddion neu staff lleol, gan gynnwys lle mae llwybrau wedi eu dargyfeirio neu eu cau, a byddwch yn wyliadwrus o'r perygl o goed neu ganghennau sy’n cwympo.
Croeso
Un o’n meysydd parcio yng Nghoedwig Crychan yw Brynffo.
Mae’n fan cychwyn ar gyfer llwybr cerdded gyda golygfeydd o’r mynyddoedd.
Ceir meinciau picnic o amgylch y maes parcio.
Llwybr cerdded
Mae arwyddbyst ar y llwybr cerdded o’r dechrau i’r diwedd.
Chwiliwch am y panel gwybodaeth ar ddechrau’r llwybr.
Dysgwch beth yw ystyr graddau’r llwybrau cerdded
Llywbr Brynffo
- Gradd: Cymedrol
- Pellter: 3½ milltir/5.4 cilomedr
- Amser: 2 awr
Mwynhewch olygfeydd eang o Fynyddoedd Cambria tua’r gogledd, cyn gostwng i ddyffryn cysgodol Cwm Crychan.
Byddwch yn dilyn y llwybr ar bwys y nant, cyn dringo i fyny trwy’r coed yn ôl i’r maes parcio.
Marchogaeth yng Nghoedwig Crychan
Ceir mynediad agored ar gyfer marchogaeth ceffylau trwy Goedwig Crychan.
Ein meysydd parcio yng Nghoedwig Crychan yw’r man cychwyn ar gyfer milltiroedd lawer o lwybrau ceffylau ar hyd ffyrdd coedwigaeth a hen draciau.
Mae yna hefyd lwybrau byr sy’n ymuno â Llwybr Epynt, llwybr ceffylau 50 milltir o hyd o amgylch terfynau ardal hyfforddiant milwrol Pontsenni.
Mae’r cyfleusterau ar gyfer marchogion yn ein meysydd parcio yn cynnwys corlannau a rheiliau rhwymo.
Mae meysydd parcio Halfway a Brynffo yn fwy addas ar gyfer bocsys ceffylau.
Ceir mynediad ar gyfer gyrwyr car a cheffyl ym maes parcio Brynffo.
I gael rhagor o wybodaeth am farchogaeth yng Nghoedwig Crychan, edrychwch ar wefan Cymdeithas Coedwig Crychan.
Coedwig Crychan
Mae maes parcio Brynffo wedi’i leoli yng Nghoedwig Crychan.
Lleolir Coedwig Crychan mewn cefn gwlad hardd rhwng Bannau Brycheiniog a Mynyddoedd Cambria, ac mae’n frith o hen lwybrau a arferai gysylltu’r ffermydd a geid yno ers talwm.
Yn y 1930au, aeth y Comisiwn Coedwigaeth ati i brynu’r ffermydd a’r tir a phlannu coed yma fel rhan o ymdrech y DU i ailgyflenwi stociau pren a oedd wedi edwino yn ystod y Rhyfel Byd Cyntaf.
Erys ambell annedd adfeiliedig, ac efallai y dewch ar eu traws yn ystod eich taith.
Mae’r goedwig yn cynnwys derw, ynn, ffawydd, coed cyll a chonwydd, ac mae’r lliwiau’n amrywio gan ddibynnu ar y tymor – o lesni cylchau’r gog yn y gwanwyn i arlliwiau euraid yr hydref.
Y dyddiau hyn, mae’r safle’n darparu pren gwerthfawr ac mae’n gartref i fywyd gwyllt amrywiol.
Mae gweilch Marthin, bwncathod a barcutiaid yn nythu yma, ac efallai y gwelwch gip ar iwrch.
Yn ogystal â’r llwybr cerdded sy’n arwain o Frynffo, ceir llwybrau cerdded sy’n arwain o dri maes parcio arall yng Nghoedwig Crychan, sef:
Maes parcio Halfway yw’r rhwyddaf i’w gyrraedd o blith y rhain ac fe’i lleolir oddi ar yr A40, ychydig filltiroedd o Lanymddyfri.
Lleolir meysydd parcio Brynffo, Fferm Cefn ac Esgair Fwyog ar is-ffyrdd oddi ar yr A483 rhwng Llanymddyfri a Llanfair-ym-Muallt.
Ymweld yn ddiogel
Rydyn ni eich eisiau chi i ddychwelyd adref yn ddiogel ar ôl eich ymweliad yma.
Rydych yn gyfrifol am eich diogelwch eich hun yn ogystal â diogelwch unrhyw blant ac anifeiliaid sydd gyda chi yn ystod eich ymweliad.
Sylwer:
- mae ymarferion milwrol yn digwydd yn y goedwig yma.
- gall fferau neu fwledi heb eu ffrwydro achosi niwed difrifol os cyffyrddir â nhw.
Am gyngor ac awgrymiadau i'ch helpu i gynllunio'ch ymweliad, ewch i dudalen Ymweld â'n lleoedd yn ddiogel.
Newidiadau i gyfleusterau ymwelwyr
Gweler brig y dudalen we hon i gael manylion unrhyw gynlluniau i gau cyfleusterau neu unrhyw newidiadau eraill i gyfleusterau ymwelwyr yma.
Er mwyn eich diogelwch, dilynwch gyfarwyddiadau'r staff ac arwyddion bob amser gan gynnwys y rhai ar gyfer dargyfeirio neu gau llwybrau.
Mae'n bosibl y bydd angen i ni ddargyfeirio neu gau llwybrau wrth i ni wneud gwaith cynnal a chadw neu gynnal gweithrediadau eraill ac mae'n bosibl y bydd angen i ni gau cyfleusterau ymwelwyr eraill dros dro.
Mewn tywydd eithafol, mae'n bosibl y byddwn yn cau cyfleusterau ar fyr rybudd oherwydd y risg o anafiadau i ymwelwyr a staff.
Trefnu digwyddiad ar ein tir
Efallai y bydd angen caniatâd gennym ni i drefnu digwyddiad neu gynnal rhai gweithgareddau ar ein tir.
Gwiriwch a gewch chi ddefnyddio tir rydyn ni’n ei reoli.
Sut i gyrraedd yma
Rydym yn argymell eich bod yn dilyn y cyfarwyddiadau hyn neu’n defnyddio’r map Google isod lle mae pin yn nodi’r lleoliad.
Mae maes parcio Brynffo 7½ milltir i'r gogledd ddwyrain o Lanymddyfri.
Cymerwch yr A483 o Lanymddyfri tuag at Lanfair-ym-Muallt.
Ar ôl 4½ milltir trowch i'r dde wrth yr arwydd brown a gwyn am Lwybrau Coedwig Crychan.
Dilynwch yr isffordd tuag at Dirabad ac ar ôl 3 filltir mae'r maes parcio Brynffo ar y dde.
Y cyfeirnod grid Arolwg Ordnans ar gyfer y maes parcio yw SN 848 410 (Explorer Map 187).
Y cod post yw SA20 0YT. Sylwer bod y cod post hwn yn cwmpasu ardal eang ac ni fydd yn mynd â chi yn uniongyrchol i’r fynedfa.
Edrychwch ar y lle hwn ar wefan What3Words.
Cludiant cyhoeddus
Y prif orsaf reilffordd agosaf yw Llanymddyfri.
Er mwyn cael manylion ynghylch cludiant cyhoeddus, ewch i wefan Traveline Cymru.
Parcio
Mae’r maes parcio yn rhad ac am ddim.
Ni chaniateir parcio dros nos.
Manylion cyswllt
Nid oes staff yn y lleoliad hwn.
Cysylltwch â’n tîm cwsmeriaid gydag unrhyw ymholiadau cyffredinol yn ystod oriau swyddfa o ddydd Llun i ddydd Gwener.
Lawrlwythiadau dogfennau cysylltiedig
Coedwig Crychan - gwybodaeth am safle Brynffo
PDF [4.5 MB]
Mannau eraill yng De Orllewin Cymru
Archwilio mwy
Gwefannau Eraill
Crychan Forest Association
Diweddarwyd ddiwethaf